منیم بؤیوک بیر آرزیم وار،اودا ستارخانین قبرینین تبریز گتیریلمه سی دیر.ا دوکتور صمد سرداری نیا

"من هر یئرده و هر حالدا اولورسامدا اوره گیم آنجاق آذربایجان اوچون چیرپینیر". دوکتور صمد سرداری نیا


اونودولماز وصیت ؛




ستارخان تهرانین اتابک پارکیندا کی، دؤیوشده آیاغیندان گولله یاراسی آلدیقدان سونرا آنجاق دؤرد ایل عؤمور سوردو. همن یارا ایله تهراندا یاشادیغی چاقلاردا بیر نئچه دؤنه قولتوق آغاجلاری ایله زیارت اوچون شاه عبدالعظیم گئده رمیش. زیارت لرینین بیرینده چئوره سینده اولان یولدا شلارینین بیریسی سردارا چاتدیریر کی، بو گون آذربایجانلیلارین بورادا مذهبی سیره ییغینجاغی اولمالیدیر.زیارت دن سونرا اؤزلرین سیره یئرینه چاتدیریرلار. مرثیه و آغلاشما قورتاردیقدان سونرا سؤز میللی سردارا وئریلیرو ستارخان اؤز تاریخی وصیت نوطقونو بئله نچی باشلاییر

"آی میللت سیزین بو غربت یئرده سیره تشکیل ائده ره ک،بیر – بیرینیزله گؤروشمه نیز،هابئله ایماملاریمیزی یاد ائتمه ینیز اولدوقجا ده یرلی دیر.آمما عزیز وطنداشلار سیزلر یاخشی بیلیرسینیز کی بیز تبریزده وار
گوجوموزله چالیشدیق ، سایسیز ایگیدلریمیز شهید اولدو. اون بیر آی تامام موحاصیره ده قالاراق،آجلیق چکدیک وسوندا ایستک لریمیزی الده ائتدیک، یعنی مشروطه قانونلاری اوزره یئنی دن تهراندا میللی مجلیسی قورا بیلدیک.
آمما نه ائتمک کی ، آلدادیجی قووه لر من ایله باغیر خانی تهرانا چکه ره ک،اتابک پارکیندا باشیمیزا نه لر گتیردیک لرینی هامینیز یاخشی بیلیرسینیز. آنجاق مبارزه نین بیرمرحله سی سونا چاتیب دیر.هله آذربایجان میللتی اؤزحاققلارینا چاتماییب دیر. آجیغیمیزا گلمه سین تکجه اوتوروب
گؤز یاشی تؤکمک له هئچ بیر یانا چاتا بیلمه ریک. بیر میللت کیمی اؤز ایستکلریمیزی الده ائده نه دک، چالیشمالییق و مبارزه نین آردین توتانلارا
یاردیم ائتمه لی و اؤزوموزو دوشونمه لییک" .


بو سؤزلر اولومیللی سرداریمیزین گئنیش نوطقونون بیر حیصه سی دیر،کی
دو کتور صمد سرداری نیا 1378 . ایلده ستارخانین قبری اوستونده
سؤیله میشدیر.


بو تؤره ن تهرانین امیرکبیر بیلیم یوردونون آذربایجانلی اؤیره نجیلری،"توپلوم درنه ییی"نین تشبوثو و چاغیریشی ایله باش توتموش ایدی. همن بیلیم یوردونون بؤیوک سالونوندا بیر طنطنه لی توپلانتیدا
مشروطه و ستارخان حاققیندا آذربایجانین میللی شخصیتلری او جومله ده ن اوستاد صمد سرداری نیا چوخ دیرلی چیخیشلار ائتمیشدیر. البته اوستادین قان تعزیغی اولدوغوندان مقاله سین باشقا بیر اؤیره نجی اوخوموشدو

همن قان تعزیغی علته گؤره اوستاد هله کیچیک ییغینجاقلاردا دا چیخیش ائتمک ده ن چکینه ردی . آرتیرمالییام کی , بو اونودولماز تدقیقاتچی و یازیچی "آذربایجان مدنییت اوجاغی"نین دائمی عضولریندن ایدی"1 ". اوجاغین دعوتین بو شرطه ایله قبول ائتمیش ایدی کی, اونا چیخیش تکلیفی اولماسین. بونلاری نظره آلاراق اوستادین قبیر اوسته اؤز- اؤزونه جوشوب چیخیش ائتمه سی ، اؤزوده هله سس سیستیمی گلمه دن مراسیم باشلامادان، بیرچوخ آداملاری اوجا سسله قبرین چئوره سینه توپلاییب و اوزون نوطق ائتمه سی منی چوخ تعجب لندیرمیش دیر

تهرانا دوغرو قایید یشیمیزدا خئیلک دانیشدیق. اوستادا بئله بیر سورغو وئردیم کی: سیزسا لوندا میکروفون آرخا سیندااؤزمقاله نیزی اوخوماد ینیز، بورادا نئجه احساسا گلدی نیز کی، بیرده ن – بیره هئچ کیم دئمه دن سؤزه باشلادینیز و گؤزه لده عهده سینده ن گله بیلدی نیز
آه چکه رک دئدی:" بیلیرسیز منیم اورادا هئچ بیر چیخیش ائتمک قصد یم یوخیدی.آنجاق او، بؤیوک قهرمانین آدینا یاراشمایان قبرینی گؤردوکده دانیشدیغیم مؤوضو یادیما دوشدو. او، بویوک اینسانین قوربت(غربت) ائلده قولتوق آغاجی ایله دولانماسی گؤزومون اؤنونده جانلاندی. اؤزومدن آسیلی اولمایاراق بیرآندا گؤردوم کی،دانیشیغا باشلامیشام . شیرین و فایدا لانمالی سؤزلرینین سونون بئله جه یئکونلاشدیردی: باخ بیزیم قهرمانلاریمیزدا
میللتیمیز کیمی داغینیق دوشوبلر؛بابک باغداد دا ، نسیمی حلبده، محمّدامین رسولزاده آنکارا دا، سید جعفر پیشه وری باکی دا ، حسین خان باغیوان قومدا،و ستارخان ایله شیخ محمّد خیا با نی بورادا : شاه عبدالعظیم ده. هله شوکورلر اولسون کی،بیر بؤیوک قهرمانیمیز اولان باغیرخانین عائله سی کئچمیش رژیمده چالیشماق اوزه رینده ائده بیلدیلر ، او داهی قهرمانینین مزارینی قصرشیریندن تبریزه کؤچورسونلر"2". ٌص: 3
ستارخانین عائله سی بیر نئچه دؤنه چالیشیبلار آمما موفق اولا بیلمه یبلر. بیلیرسینیز؛
ستارخانین عائله سی بیر نئچه دؤنه چالیشیبلار آمما موفق اولا بیلمه یبلر. بیلیرسینیز؛ آنجاق منیم بؤیوک بیر آرزیم وار، اودا : "ستارخانین قبرینین تبریزه گتیریلمه سی دیر ". و اؤز دانیشیغینا سون قویدو .

نه یازیق کی،اوستادین عؤمرو وفا قیلمادی. بلکه ده اؤز طبیعی عؤمرون یا سا یدی، بئله نچی بیربایرامین شاهیدی اولا بیلئیدی . اوستاد دوکتورصمد سرداری نیا کئفسیزلیک یاتاغیندا اولاندا سون
گؤروشلرینین بیرینده آنایوردوموز آذربایجانا اولان عشق و محبتین بئله جه آچیقلادی:
" من هر یئر ده وهر حالدا اولورسامدا اوره گیم آنجاق آذربایجان اوچون چیرپینیر"




روحو شاد – یولو داواملی اولسون

تبریز – حسن دمیرچی

17 /10/1387











1- آذربایجان مدنییت اوجاغیندان دونیا دان گؤچن لر: حسین آرش، پروفسور ذهتابی، رضا غفاری، پروفسور شهابی ، سون اولاراق دوکتور صمد سرداری نیا اولموشلار.
2- باغیرخان اؤز 17 سیلاحداشی ایله قصرشیرینده کوردلره قوناق اولار کن،اونلاری تاجیرلر سانان قوناق صاحیبلری،یول یورغونو اولان قوناقلاری یوخو ایچینده اؤلدورورلر.