اؤلدو وار دؤندو یوخدو

:حسن دمیرچی نین دوستاقدان یازدیغی مکتوبو

سوروشوردوم عدالت نه دیر، نه چیدیر – بیر بئله کوتله لر دئییرلر اوندان؟باشینی قووزاییب اوزومه باخدی، بیر سؤز تاچا بیلمه ییب توموخدو؛ سؤیله دی: دئییرلر بیزیم شه هرده دلی بیر کیشییدی، داشا باسدیلار. – بینابلی شاعیر

دوغرودور عدالت بیزیم اؤلکه ده داشا باسیلیب جاندان دوشمکده دیر، ائله اونا گؤره (اوغرو ائله باغیریر کی دوغرونون باغری چاتلاییر). نه بیلیم، بلکه ده بیز یئتیم میللتلر اوچون بئله دیر.بیر شاعیر اؤز سئوگی سیندن گیلئی لنه رک بئله بیر شعر یازیر

رقیبی گؤرنده گولور ناز ائدیر اونا

منی گؤرنده آجیقلی باخیر، چوخ ماراقلیدیر

بیزیمکی ده چوخ ماراقلیدیر کی، آلچاق بیریسی آذربایجانیمیزین شریف میللتینه اییرنج توهین ائده رک فیرتانا سالیب و ایندی ایسه آزاد اولوب؛ و اؤز عادی یاشاییشیندادیر. ائله جه ده اونو چاپ ائدیب یایان ایران قزئتی ده برائت قازانمیش و بللی دیر کی تئزلیکله یئنی دن یاییلاجاقدیر. آمما منکی آذربایجانین قئرتلی میللتینین سسینه سس وئره رک خورداد آیینین بیرینده میلیونلوق یوروشونه قاتیلاراق اؤز میللی شرفیمیزدن دیفاع ائتمیشم، هله ده یولداشلاریملا بیرلیکده دوستاقدایام و موسیقی مکتبیمین ده جاوازی لغو اولاراق باغلانیب؛ ائل سؤزو وار کی: "بیر دام ایکی هاوا". کئچمیشلردن بری بو اوگئی – دوغمالیقلاری و بو حاقسیزلیقلاری گؤرن بؤیوک شهریار یازیر

یارب نه دیر بیر بو قدر اوره کلری قان ائتدیین

قولو باغلی قالاجاقدیر نه واختا جان آذربایجان

دیلی باغلی میللتین ائله قولو دا باغلی، اوره یی ده قان اولمالیدیر. 50 – ایللیک عزیز دوستوم، اوستادیم، گونئی آذربایجان تارینین آتاسی ساییلان اوستاد شاطریانی گؤرمک اوچون بیر ساعات اولسون دئیه وقت آلا بیلمه دیم؛ و منیم چون نیسگیل ووراراق دونیادان کؤچدو . آمما میلیون – میلیون تورکه توهین ائدنلر، آیین شایین گزیب دولانا بیلیرلر. تحقیر تحقیر اوستدن گلدییینه باخمایاراق، شاعیر سهندین، شهریارا یازدیغی سؤزه اینانیرام کی، یازیر

شاعیریم سؤزومو قوربته سالما

قولاق آس دونیادا گؤر بیر نه سسدیر؛

باغریوی سیخماسین بو های – هارایلار

قیریلان زنجیردیر؛ سینان قفسدیر

حؤرمتلی وطنداشلاریم، منیم بو مکتوبو یازماقدا اؤز آزادلیغیم اوچون هئچ بیر کیمسه دن یاردیم دیله مک یوخ بلکه آییق ویجدانلارا بیز آذربایجانلیلار اوچون هر بیر ساحه ده اولونان قضاوتلری چاتدیرماق ایسته ییرم، یوخسا منیم بو حاقسیزلیقلارا سون سؤزوم بودور

یادلاری قوومایینجا

شررینی سوومایینجا

یاندی وار سؤندو یوخدو

اؤلدو وار دؤندو یوخدو

تبریز زیندانی — 15/7/85

حسن دمیرچی

……………………

.او آذربایجان دیر، تبریزین دار گونلرینین آذربایجانی
لاله جوانشیر

یوردداش غم چکمه، غم چکمه

بیرگون آزاد اولار وطن

یولداش غم چکمه، غم چکمه

سئوینج ایله دولار وطن

او آذربایجان دیر، تبریزین دار گونلرینین آذربایجانی. آیدا بیر یول آموزشگاهینین قاپیسینا وورولموش مؤهورلر، صحنه یه چیخماغا ایزین وئرمه مک لر، هده لر، قورخولار دؤنده ره بیلمه ییب اونو آذربایجان اولماقدان. شهره های – کوی دوشوب؛ حسن آذربایجان تبریز زندانیندا اوره ک خسته لیگی ایله یاتیب قالخیر. گئجه یاریسی ائوینه تؤکولوب آییله سینین گؤزو اؤنونده اوغلو بابک له بیرلیکده دؤیوب سونرا آپاریبلار. دوشونوردوم، اونون آزادلیغینا اؤزه ل چالیشمالار باشلاتماق هر بیریمیزین بورجودور. تبریزده بو قده ر موسیقی چی و موسیقی آموزشگاهی وارکن سیزجه نه دن آنجاق حسن آذربایجانین سوراغینا گئدیب تبریز اطلاعاتی؟ چونکو او بؤیوک – کیچیک دئمه دن خالقین تاریخینی تارین تئللرینده خالقین اوره گینه کؤچوروب. او زور گونلرین، چتین آنلارین سوسمایان دیلیدیر. آذربایجانی شهر – شهر دولاشیب " تبریز تسلیم اولا بیلمز/ دونیا بئله قالا بیلمز " چاغیریب. چاغیریب و اونو سئون میللتینین کؤنلونده آذربایجان اولوب. تبریز اونون کیمی لرین انفرادی گئجه لرینین رؤیاسیدیر. هر تک – تکیمیز حسن آذربایجانلارین، ذهتابی لرین … آلین ترلری ایله یئتیشمیش گنج لریک. بیزلری اونلار جوجردیب. گلین بورجوموزو آزدا اولسا اؤده یک. گلین اونون عاییله سنین یانیندا اولاق. سینمالارینا ایزین وئرمه یک